人體的google earth

從細細個開始，我就鍾意睇地圖。無論係地圖定地球儀，都可以幫我哋了解唔同嘅地理、歷史同文化知識。譬如歷史故事、國際貿易新聞，如果可以參考地圖，就即刻變得易明同清晰。搭飛機嗰陣，我都習慣睇住飛行路線，估吓而家係邊片海或者邊塊大陸上空。有時候，發現由香港飛歐洲需要多飛兩三個鐘頭，甚至機票都貴咗啲。呢啲變化，通常係因為某啲戰爭地區，例如俄羅斯、烏克蘭，同埋中東，引致航線需要兜遠啲，避開高危空域。所以，你會見到有啲航班嗰條線越嚟越靠近非洲，時間拉長，成本亦因此增加。

其實，喺中醫同西醫睇嚟，人體就好似一幅地圖，每個部位之間都係緊密鏈接。我哋透過身體嘅「地圖」——亦即人體嘅 Mapping ——去認知健康狀況，了解疾病點樣形成，甚至進一步制定治療方案。就好似 Google Earth 我哋點用航拍俯瞰地球一樣，如果我哋可以清楚掌握人體內心臟同腎臟、肝臟同脾胃等器官系統之間嘅互動，就自然會明白得更加全面。

中醫對於人體 Mapping 嘅概念特別著重。睇病嘅過程中，中醫師會觀察病人嘅手指、面色、眼神，甚至用把脈方法，嚟掌握你全身健康狀況。從手腕到脈象嘅微細變化，中醫認為可以反映五臟六腑嘅健康狀態。雖然喺西醫科學角度，未必理解到呢啲外在表徵同內臟健康狀態嘅直接聯繫，但中醫相信：「外在徵象，係內在情況嘅投射。」意思係，透過睇到摸到嘅表現，就能了解你內臟、經絡之間嘅情況。

呢個概念，就好似分析地圖數據。一方面，我哋搭飛機飛遠路線嘅時候會因戰區而兜遠；另一方面，如果某啲食物突然之間變貴，例如日本、內地撞正天災，令某啲蔬菜或者漁產品出口受影響，食日本菜都會貴好多。同理可證，人體亦係透過唔同症狀去反映內部嘅變化。只有通過外在情況，先至可以估計身體背後出現緊嘅具體問題。

中醫認為，氣血嘅流動係人體健康嘅關鍵。五臟六腑全靠氣血暢通，經絡依靠流動去維持機能運作。道理就好似經濟運作，依賴交通網絡順暢去輸送貨物、人流同資金。如果供應鏈某處受阻，例如早幾年疫情封鎖機場、航運停擺，全球經濟自然受重創。同樣地，喺人體中，如果經絡阻塞，就會造成身體功能嘅問題，長期落去更加可以引發大病。

有啲人嘅肝氣唔暢通，肝經阻滯，時間一耐，可能會導致乳房疾病、甲狀腺問題，甚至頭痛等症狀。但人體亦有一定自我調節能力。比喻來講，當蘇伊士運河受到海盜攻擊受阻嘅時候，船運會被迫兜經其他航線, 行遠啲, 經過非洲嘅好望角，雖然成本貴咗，但整體系統仍可以勉強運作。人體亦係咁，如果某啲經絡阻塞，其他部位可以暫時補救，但長期不處理, 就好似任由海盜攻擊其他地方. 阻塞的地方會不斷擴大,就會牽一髮動全身，影響健康嘅全局平衡。

中醫用針灸去疏通經絡，最能說明人體 Mapping 嘅精妙。例如，針腳上嘅足三里穴位，可以舒緩胃痛或者消化不良。明明穴位喺膝頭哥附近，點解可以影響胃部呢？道理就係經絡同全身網絡互相關連，遠處治療亦可以解決內部問題。另一個例子，針灸手部某個穴位可以止牙痛或者頭痛，呢啲都係經絡連繫整體健康嘅典型例子。

西醫喺 Mapping 上亦有類似操作。例如針對癌症用嘅標靶藥物，好似打仗集中力量攻克癌細胞某一條生長信號路徑（例如 EGFR）。不過，腫瘤細胞好聰明，會發展抗藥性，例如通過 MET 路徑重新增強生長。於是醫生需要重新設計策略，配合其他治療方法去壓制。喺癌症治療中，亦有針對腫瘤周邊環境嘅藥物，例如抑制血管新生令腫瘤附近血管正常化，方便免疫細胞或者化療藥更有效穿透腫瘤組織。

免疫治療更係以 Mapping 為核心。例如 CTLA4 抑制劑針對淋巴結激活免疫細胞，而 PDL1 抑制劑則集中喺腫瘤附近激活局部免疫細胞。同樣嘅免疫療法，因為作用範圍唔同，治療效果亦會有所變化。從中可以睇到，無論中醫講經絡同穴位，定係西醫講信號通路，同樣都係喺人體呢幅「地圖」上搵出解決問題嘅方法。

更進一步，物理治療會用肌肉同筋膜之間嘅拉扯結構來解釋病因。例如，頸肌緊張會影響手部功能，上半身筋膜問題可以牽連到下半身不適。中醫、西醫再加上物理治療，其實最終目標都係希望更全面理解人體內外連繫嘅 Mapping。

人體真係好似一幅龐大而複雜嘅地圖, 雖然而家中西醫嘅認識仍然只係集中喺人體嘅部分層面，但我哋可以期待未來十年，隨著人工智能AI同大數據技術嘅進步，研究將會進一步深入。無論係基因研究、蛋白質分析，甚至中醫講嘅經絡結構，都將會逐步被解構，令呢幅人體地圖越畫越清晰,為疾病治療帶嚟更多希望。

#蘇子謙醫生

#蘇子謙中醫師

#中西醫結合

#中醫藥

#臨床腫瘤科医生

#臨床腫瘤科

#網狀放射治療